إلا اللقافة .. أعيت من يداويها

السلام عليكم

في حياتنا الممله والروتينية .. نسمع الكثير من الكلمات التي نتداولها بشكل متكرر كل يوم! .. مثل الزلابة والرخمة الكمخة.................. والملقوف ... الخ

لكن راح نوقف عند كلمة من هذه الكلمات المتداولة .. وهي الملقوف!
وراح نشرح هالكلمة اللي ينطوي تحتها بحور من المعاني !!


ⓚ


تعريف الملقوف !!
مصطلح اللقافه : كلمة نقصد فيها الشخص الذي يتدخل في امور لا تعنيه ويريد معرفة أي شئ وكل شئ ..


ⓚ

منهو الملقوف !!
الملقوف هو شخص يفتقد للباقة وحسن الخلق مهمتة الاساسية .. نشر الاشاعات
يعني بمجرد ما يسمع منك كلمة أو يشوف له مشهد بسيط .. يبدأ يألف له قصة درامية حزينة!
مثلاً .. في يوم من الايام .. وأنت جاي للبيت مستعجل تبي تلحق على الغدا وكنت مسرع! وأخذت لك المطب اللي قدام بيت جاركم على الطاير..

ووقتها ولد جاركم كان جالس برى عند باب بيتهم يتأمل مستقبله (الخايس) في هالقوايل! هنا .. راح يشتغل دور الملقوف!
(( هذا وش فيه مستعجل))! وليش أخذ المطب بسرعة!! وليش ما سلمّ عليّ ولا ضحك في خشتي! .. لا لا اكيد فيه شيء

بسرعة الصاروخ (عسى الصاروخ يطيرّ نص وجهه) راح لأمه وهو يلهث ولسانه يسحب في الارض ... يما يما يما .. هاهي هاهي هاهي (ياخذ أنفاسه)
قبل شوي ولد جارنا مسرع على سيارته وخذا المطب اللي قدام بيتنا بسرعة .. وكان يبكي! وشكله معفوس .. واول ما نزل من السيارة .. قام يصايح حتى ما ضحك في وجهي!!!!!

وبما أن اللقافة عامل وراثي!! .. راحت أمه بسرعة البرق (عسى البرق ينفضها نفض هي وولدها) وشالت سماعة التلفون!
الو الو .. بصوت عالي -لاعبتن فيها اللقافة لعب- وش فيكم اللهم يا كافي ولدي يقول أن ولدتس ما سلم عليه ولا ضحك في وجهه وطايرن على سيارته ويصيح .. قطع قلبي بصياحه وانا اااامه (عاشت الدور!!)

هلا يا خالتي (رد الولد عليها)! (هههههههههههه) ضحكة واحد مستغرب!!

ام الملقوف: هاااااااااااو .. وش فيك ياوليدي! وش صاير لك!؟
رد الولد عليها .. مافيني شيء يا خالة .. هذا انا جالس أتغدى ومالي من الشيطان طاري .. وولدتس الله يهديه متروّع يوم شافني مسرع!!

أم الملقوف .. تلتفت لولدها بعد ما سكرت السماعة وهي تجر (اذيال الهزيمة) وتقول له
جعلك الساحق والماحق والبلا المتلاحق اللي يسحقك ويمحقك ووين ماتروح يلحقك ..


*

للقافة .. مسميات كثيرة
1- ملقوف
2- فضولي
3- حشري
4- متطفل
5- ......
6- ملقوووف ملقوووف



*

مثال على اللقافة!!
كان هناك ثريّ من أهل القصيم جمع له ثروة وخير وقال لهم: اسمعوني انا قررت أعطيكم نصف أرباحي هالسنة بس بشرط تتركون عنكم "اللقافة".
قام واحد منهم وهو مستغرب! وقال: والنصف الثاني "منهولوووووه؟"..!!


*


درجات اللقافة :
يبلغ المرء قمتها ويصل أعلاها وتسمى هذه الدرجة ( الشفاحة ) ، وتختلف درجة اللقافة بحسب اهتمامك باللي عند الغير ، فمثلاً لو ( شفت ولد جاركم الطفران واقف عند البيت وقدامه سيارة جديدة ) فأول شيء راح يدور في بال المشفوح (بعد ما يسعبل ويرتفع ضغطه) !! من له هالسيارة .. وشلون جت عند باب جارنا الطفران ... و و و و .. ولكن هالاهتمام يخف ويقل اذا ما كنت تعرف ساكن البيت وحالته المادية ..

وترتفع درجة اللقافة في القرى عنها في المدن ، إذا أن نظرية التناسب الطردي تنطبق هنا ، فكلما دحدر الإنسان في الجهل ..
وصارت هالدمجة ( تخرفش ) وفاضية ولم تستعمل إطلاقاً فيما يفيد ، فهذا مؤشر إيجابي لارتفاع درجة اللقافة..




*


فيه ناس تجهل اللقافة وهم ملاقيف! (مساكين نعذرهم .. ماعندهم خبر عن اللقافة)!!

وفيه ناس تعرف اللقافة بس ما يدرون أنهم ملاقيف! ( النوع هذا .. نقدر نلمحّ له علشان يدري انه ملقوف! يعني كل ما تلقفّ على شيء قلنا له .. اترك اللقافة عنك ياااخي .. ومرة مرتين ثلاث .. راح يدري أنه ملقوف!)

فيه ناس تعرف اللقافة وعندها خبر انهم ملاقيف! (النوع هذا ماله حل .. الا انك تلمهم واحد واحد في كيس اسود وتذبهم وسط بركة طحالب)

فيه ناس اللقافة تمشي في دمها .. إلى درجة أن بعضهم يعتبرها نوع من الذكاء الاجتماعي (النوع هذا ما ينفع معه لا بركة طحالب ولا تلميح .. لان حالتهم صعبة )

*


فوائد اللقافة :
1- مصدر معلوماتي ( خطير ) جدا يؤمن لك المعلومة بأسهل الطرق، ومن اللقافة تطورت وسائل نقل المعلومات العلمية ووكالات الأنباء ..
2- الشعور بسعادة غامرة ونشوة فرح وإنتصار تسيطر على مشاعرك .... اذا عرفت اشياء دقيقة وصغيرة تخص غيرك
3- الشعور بالعظمة والكبرياء وإشباع غرور النفس ، وذلك حينما تعرف بأسرار الناس ، فتشعر بأن كل مالديهم أنت على معرفة به
5- اذا عرفت اسم الشخص صاحب اليوزر معك في المنتدى ، تصبح تتلاعب بمشاعره ( وتذب عليه ... )



*

أضرار اللقافة :
1- قال صلى الله عليه وسلم من حسن إسلام المرء تركه مالا يعنيه.
2- تنحرق أعصاب الملقوف وخاصة المشافيح اذا ما حصلوا على المعلومة باسهل الطرق اللقافة النسائية من أشد أنواع ( اللقافة فتكاً ) .. ولنا في قصة الشريب بزة خير مثال ..
3- قد تنهي اللقافة حياة صاحبها ... فمثلا لو شاف الإنسان حادث في الطريق الثاني من الدائري ... ( ودق فرامل ) ونزل من سيارته بيتفرج على الحادث واندمج في التفكير (شلون صار هالحادث ) .. تجيه سيارة ثانية من الشارع المعاكس وتطيره هو وتفكيره! وكثير ما حصل هالشيء ..
4- اللقافة قد تتسبب في خسائر مادية ... اذا شريت أي جهاز ولا تعرف تستخدمه .. وقمت تعبث فيه .... وخرب فهذي من ثمار اللقافة ..


ⓚ

نماذج من اللقافة :
في بداية التسعينات وبعد انقطاع ( سيارات الفورد ) حلت عوضا عنها سيارات ( جي أم سي ) الونيتات أقصد وصارت تشيل الخضار من المزارع وتوصلها للرياض .. وخاصة الجح ... وكان فيه ناس يشيلون ( جح ) من مزارع كثيرة وكان واحد ماهو من أهل الديرة معه (جمس 72) أبيض ويعرفونه بعض الزلايب اللي يشيلون جح .. المهم فيه ناس فاضين مالهم شغل إلا ( الحش ) في خلق الله ، مر من عندهم الجمس .. ( وقزوه ) مضبوط ... وعرفوا موديله ، ورقم لوحته، ونوع الكفرات ، ولون المرتبة ووووووو ... واختلفوا : عند نقطة ذات أهمية كبرى عند خبراء السواليف ..
واللي هي .. سيارته شراها جديدة والا مستعملة!

ويوم جاء بكرا قعدوا يحترون الرجال عند محطة البنزين وكل واحد جالس على إعصابه ... ووقفوه .. وسألوه بكل ( سعة وجه ) ياخوووي السيارة أنت شريتها جديدة والا مستعملة!

قمة اللقافة
1- قمة اللقافة وأنت قاعد تقرأ الجريدة .. وتبي تقلب الصفحة! الا واحد جنبك يقول لك(لحظة لحظة ياخي جالس اقرأ لا تقلب)!
2- قمة اللقافة وأنت جالس مع اخوياك في المطعم وتسولفون! وفيه واحد جنبكم (فضولي) كل شوي يطالع فيكم! ويضحك .. ( لا أحسن تعال تعش معنا) 3- قمة اللقافة .. اذا كنت حاط حالتك في المسن (مشغول) وينط عليك واحد .. (وجهه وسيع وبارد) ويسئلك !! في ااااااااااااايش مشغول!؟ امانة امانة علمنيّ
لقافة على خفيف :
1- الواحد اذا جلس في سيارته عند باب قصر أفراح يحتري زوجته وإلا أمه ، وطلعت حرمه .. ما تلاحظ أنه بيقزها ويتابعها إلين تركب في السيارة ....... ليه ؟ لقااااافة
2- اذا طلعت عند بابكم وجارك فاتح الشنطة وينزل منها مقاضي تلقاك لاشعوريا ... تمد رقبتك وتصرّ عيونك .. ودك تعرف وش في هالأكياس ...... برضو لقااااافة
3- دق الجوال على خويك وكلم وبدأ يضحك ... وانتهت المكالمة وأنت ماعرفت ( اللي يكلم ) تنحرق ودك تعرفه ليه ...... لقااااافة

للملاقيف فقط .. هذا الموضوع كتبته قبل ثلاث سنوات تقريباً في أحد المنتديات .. ولكن أخذته وأضفت عليه أشياء كثيرة تتوافق مع هذا العصر وهذا الجيل (ارحمنا ياشيخ)!

ختاماً ، صدق المتنبي يوم قال
لكل داء دواء يستطب به
إلا اللقافة! أعيت من يداويها

وبس

ابدعت في انتقاء الطرح
اشكرك على جمالية نقلك الراقي
تألقت بروعة موضوعك
ننتظرابداعك بكل شوق
تحياتي وتقديري

سلمت الأيادي على الطرح
ربي يعطيك العافية