معي بعض الظنون تمنعني

تضيق فيني دنيتي وأسكت وفي نفسي أقول يا خاطري لا تضيق شوف الفضا ما أوسعه

وأنا تعبت وما بقى للوضع بيديني حلـول بس أتفائل بالصبر وانثر همومي واجمعـــه

ما عاد فيني على مشواري الباقي ميول لكن معي بعض الظنون تمنعني أني أقطعـــه

يا حظي العاثر معك ما فيه للفرحة حصول ولا الأمل في حضرتك يمكن أعانق مطلعـــه

والسالفة قصة هوى عيت تصدقها العقــول حب شبع من قلب بس القلب عيا يشبعـــه



قال المثل فكر في المخرج قبل تبدأ الدخول والحب عيبه له دخول لكن مخرج ما مــعه

الحلم مهما انتظرته عارف ماله وصـول حتى الفرح ما أعرفه ما غير طاريه أسمعـــه

وإن جيت للفرقا تجي في بالي الذكرى تجول حتى تذكرني هنا عمري وليلة مصــرعه

الوقت مدري ليه لا منه ابتسم يمضي عجول أو ليه يجرحنا ولا مرة قدرنا نمنعــــــه

عندي كثير الأسئلة ولأجوبة فيها تطــول ساعات ما ألقى لي إجابة كود دمعٍ أدمعــه