فساتينك / بساتينك !!

فساتينك

هذي أو بساتينك ؟!!
قسى تينك / وأنا محبوبك الأول ..
وللحيني على خبرك :
أجوعك وأشبعك أكثر !!
أضمى وأرتويك أكثر !!
من أوّل بحر عشرينك / إلى آخر بحر ستّينك !!
وعلى شانك ..
ماني مشتهي إلا :
ثمرك و ورد رمّانك ..
ولو أنّه قسى تينك !!

فساتينك ..
ياكثر أحبابها / أحبابك
أنا وعطرك ودولابك !!
( يقطع شرّ دولابك )
لاشافك مقبله فجأه عليه يقول :
وش جابك ؟!!


هذْا الفستان :
قطعه من حقول القمح !!
ناعم زيّ حريرك ..
ملمسه زيّ ملمسك !!
كم ( رمح / سنابل ) ممتلي ؟!!
بس : سمح !!
تخيّر ..
مايبي غيرك !!
تخيّل ..
مالقى غيرك !!



هذْا الأبيض :
أحسّه من جليد !!
ومن نهار العيد !!
طفولتك البريئه فيه أقراها !!
وتقراها الفراشات لضحى التنهيد !!
تماسكتي أنتي وياه أيد بـ أيد ..
رحلتوا لآخر الدنيا / لدنيا مابها إلا أثنين !!
ولا أدري أي واحد فيكم مين ؟!!
هذْا الأبيض :
خذا طهرك !!
مصبّه ينتهيك / ويبتدي لاسال من نهرك !!
ساتر ..
بس يا سااااتر يحسبونه كشف ظهرك !!


الأخضر مو طبيعي !!
أووووه قصدي ذا ربيعي / بحت !!
يميل أن مالت أغصانك !!
ويرقص كيروانه تحت !!
ويغرّد ..
أحبّه بس على شانك
على شانك أنا : سعودي !!
مع أنّي شخص متمرّد / ساخط حيل متشرّد !!
ومتجرّد .. حتى حتى من ذاتي !!
ودايم أنتظر لحظه تجي ويحين : توديعي !!




هذْا الفستان من الآخر :
فاخر جداً / وساخر !!
لأنه يشبه الدنيا بعيون الصبايا
لاحضرتي حفله ..
وكنتي كأنكّ بس معزومه ألحالك !!
أو سرن غفله !!





الأزرق :
ذا سما أو ماء ؟!!





بقى الأحمر :
بقى النازف / بقى العازف !!
لون العاطفه والحب ..
أحبّك يا أحبّك غصب !!
كذا الأحمر !!نلوّن فيه قلب وقلب !!
بقى الأحمر :
بقى الحارق / بقى السارق !!
سرق كل لون زيّه فيك ..
سرق لون الخدود / وجمرتين / ودمّ شريانك !!
وعكسلك لوني الأسمر !!
هذْا الأحمر :
على ما أعتقد مو لونه الأصلي ؟!!
لكن أكتسى حُمره عشانه بس فستانك !!
عشانه أحسن ألوانك !!



فساتينك ..
إلين الحين عيّت لاتعلّمني :
من اللي يرتدي الثاني ؟!!