ياصاحبي وين المقادير ودتك

ياصاحبي وين المقادير ودتك=اقفت ركابك عن وليفك رحايل
لفتني الدنيا بشوقك ولفتك=وكساك شوقي مثل سود الجدايل
اللي ليانقضتهنه وغطتك=ماكنها الا من سبيب الاصايل
وحل الفراق اللي على غير ارادتك=مايل لوان الوقت ماهوب مايل
وضيعت عنوانك وضيعت جرتك=وجلست تصلاني لهيب القوايل
على حرى وجهتك وخطيت وجهتك=ورجعت ماملك عن مصيرك دلايل
وبعد شهر جاني خبر عن مدينتك=اللي سكنت ابها وجات الصمايل
وخذت انا عنوان بيتك وحارتك=وجيت ولقيت الوضع مزري وعايل
جيران بيتك كلبوهم قرابتك=ولاعاد في الدعوى مزوح وتحايل
هانتني الدنيا ببعدك وهانتك=وتكسرت حدب الضلوع النحايل
يالعنبو من لامني في محبتك=يااللي بنظراتك تسو الهوايل
بين احترامي لك وشكلك وهيبتك=احترت للقالك شبيه وبدايل
تاخذ من القرناس عينه ونظرتك=تخضع لها معظم شيوخ القبايل
وتشابه الريم الجفول التفاتتك=وعنقك مثل عنقه ولاني بقايل
عن باقي التفصيل حالت مهابتك=ومهابت اللي في الصفوف الاوايل
هيبتك ياالغالي وهيبة قبيلتك=قد حيرت قبلي رجال الحمايل
ذكراك في قلبي وفالعين صورتك=وحبك يبي يبقا ولاهوب زايل
عيني لها عامين مايوم شافتك=وانا اتوجد وتحرى الرسايل
وعجزت لاصبر وتهنى بغيبتك=مغير اخايل وتحرى المخايل
ونذرت نذر ان كان الايام جابتك=لذبح على شوفك من الذود حايل