مـانـجـهـل الـدنـيـا ولانعـلـم الـغـيـب

مانجهل الدنيا .. ولانعلم الغيب
مير الزمان اليآ تمايل .. تمايل


تصيب بعض أحيان .. وأحياناً تخيب
وأنت اعتبرها مثل كبوة أصايل

نمشي على درب الكرم .. والمواجيب
ولاشكينا من سموم القوايل

لو البشر ما هي تحب الأصاعيب
ماكان عاشت فالجزيرة .. قبايل

الطيب ما يعني تجنبك .. العيب
الطيب .. كيف تطول .. روس الطوايل

أقسى طعون الضيف طعنة .. معازيب
لا من غدت بين الردى والتحايل

يا صاحبي والحزن شيخ المحاديب
تحت أمره تقوم وتطيح الحمايل

ترى الكرم يستر كبار العذاريب
وترى البخل يقطع يدين الفضايل

من شفت ناب الذيب في جيفة الذيب
آمنت بأن أهل المروّة قلايل

لا صرت ما تضمن قلوب الأصاحيب
جنّب قبل تلفي عليك الفشايل

أحد(ن) إذا مديت له طيبك .. يغيب
ماتملى عيونه كبار الفعايل

وأحد(ن) .. يموت إن كان سويت به طيب
يخـاف مايـقدر يـرد الجـمايـل