خلوها لي

راحت من يديني كذا وانا اناظر في يدي

لا قادر اوصل دربها ولا قادر اقوى بعادها

حسيت يوم فراقها كن جسدي ما هو جسدي

مثل الشعوب اللي تحس غربة وهي ببلادها

قولو لها محتاجها والشوق حاديني حدي

تعبت من كثر السهر البعد نفسي بادها

ضاع جهدي فدوة لها لو منها ضاع جهدي

احط موعد وانتظر يمكن تجي بميعادها

هي بس ترجعلي وانا نذر علي اذبح فدي

واني ما عاد انسى ابد تاريخ عيد ميلادها

ازعلتها وكان السبب تافه مثل وجه الردي

اني نسيت اذكر ابارك للفرح بعيدها

تطور الموقف وانا ما كنت في الموقف هذي

كابرت انا ومثلي بعد هي كابرت بعنادها

الحق معها واعترف والحق ما والله يغدي

والغلطة ما تحسب على اللي لا غلط ما عادها

قولوا لها يشهد علي الليل والجرح الندي

ساعة عطتني ظهرها والقلب يصرخ نادها

وان كانها عيت تجي وراحت ورى البعد تعدي

الله معاها بس تقول البعد وش فادها

واذا سكتت او دنقت او طالعة صوب الجدي

ترا ودها بالرجوع وعنادها ما قادها

خلوها لي وانا اجي احط يدها في يدي

وكان العناد براسها ابوس راس عنادها