القلب مغلق للصيانه

ساد الظلام وذعذع النود وأمسيت أعيد الإسطوانه

وأخذت أطق العود بالعود واهز غصن الخيزرانه

يا هاجسي ما عنك منشود خلك عليك الله وأمانه

لولا الوفا والطيب والجود وأخاف من ضيع الأمانه

والله لأسد عيونك السود وأقول ما للشعر خانه

خطا قصيدي غير مقصود يوم ابدعه تضحك ثمانه

أجاذبه حاوي ومردود واراهنه واكسب رهانه

وبعض المحبه ما بها فود والوقت يا صعب امتحانه

دام الميانه مالها حدود يابنت لا عادت ميانه

لا قلت احبك عندي شهود دمي وفوره وغليانه

وهمن يجي ويروح ويعود ضيق وسيعين البطانه

شاب الهوى والعمر محدود ولا عاد له قدر ومكانه

كل الخطايا هينه كود زيف المشاعر والخيانه

تفضلي من غير مطرود القلب مغلق للصيانه

قلتي لسان الحال معقود ثم قلت صح الله لسانه