 |
|
 |
رهين الشوق |
|
|
|||||||
| ملتقى القصص والروايات بـِداخلي روَاية .. طويله , قصيره TxT قـِصَّـة مِـنْ ريحِ ألفِ ليلـَة وليـْلة..هنا خيال الراوي |
 |
2011-03-21, 11:12 AM
|
#1 | |
 
|
روايه كل يوم لك حال جديد .. مره قريب و مره بعيد - روايه طويله جريئه - للجوال txt
خلف تلك الزوايا وفي ركن بعيد جدا تتناثر الشموع هنا وهناك....
ومع كل موجة هواء تهب تضيئ تلك الشموع او ينطفى نورها.... تلك الشموع التي تفرح وتتالم وتحزن وتضحك وتعاني هي التي نعيش معها لفترة طويلة جدا بكل المشاعر الممتزجة فيها ..... حكاياهم واقعية ولكنها تتجسد في شخصيات خيالية نتابعها بكل مافينا سواء احببناهم او كرهناهم.... من جديد انا معكم ولااجلكم ايها الاعزاء.... اعذروني من الان اذا ماقصرت بحقكم او ازعجتكم بقلمي في لحظة ما... ها انا اعود لكم مجددا مع مولودة جديدة....اختكم ملح الحياة. ************************************************** ************************************************** ********************************* البارت الاول,,,, ياسمين/وين وصلنا؟ مشاعل/والله مدري...وش كنتي تقولين انتي اصلا؟ ياسمين مسوية معصبة/يا سلااااام يعني ماكنتي معي!!! مشاعل وهي تنسدح على السرير/لاوالله ماكنت معك كنت اقولب فكرة براسي... ياسمين/سمعتي يانوير وش تقول الاخت؟ مشاعل وهي تناظر بنورة اللي واقفة قبال النافذة/اسمع هاذي بعد وش عندك هناك... ياسمين بغمز/تتطمن حبيب القلب رجع ولالسه؟ لفت لهم نورة وقالت بحدة/ياسمينوا ووجع!!! مشاعل/هههههه ياسمين/قولي الصدق يالله... نورة بنرفزة وهي تجلس معهم على حافة السرير/الله ياخذه ويفكني من سيرته زين... مشاعل/علامك انتي من تجي سيرته انقلبتي فوق تحت؟؟؟ *********************************** خالد/اليوم مقدر.... وضحى بنرفزة/طبعا ماتقدر.. خالد بهدوء/انتي عارفة ان اليوم خواتي يتجمعون وانا ماابي اتخلف عن ها الجمعة؟ وضحى وهي تعدل كحلها/تتهنوا... ساد الصمت لثواني بينهم..... خالد بحنان/وضحى... وضحى/.......... خالد بنفس الحنان/تعالي... وضحى رمت الفرشة من يدها بقوة وتنهدت.... قام خالد من مكانه وجاها بسرعة وحوط كتوفها بيدينه وهمس باذنها/علامك يالغلا... وضحى وهي مغمضة عيونها/ولاشي.... خالد باصرار/مايصير شوفي ها الكشرة اللي بوجهك وانتي تعرفين ان فيك شي... وضحى بصرامة وهي تبي تقوم/قلت لك ولاشي اتركني خلاص...وبعدين انت مو عندك جمعة في بيت اهلك خلاص روح لاتتاْخر؟ خالد بهدوء/وضحى شفيك اذا على السوق تراه مابيطير لاتزعلين نفسك؟ وضحى بانفعال/ومن قال اني زعلانة اصلا!! تنهد خالد وابتعد عنها وراح يلبس شماغه علشان يطلع... وضحى بلا مبالاة/يمديك توصلني بيت اهلي ولابتتاْخر عن موعدك؟ ناظرها بدون مايتكلم.. وضحى بنفس الاسلوب/خلاص وصل الجواب لاتقعد تناظرني كذا بدق على اخوي يمرني... خالد/وانتي ليش ماتجين معي بيت اهلي؟ وضحى/اليوم بالذات مالي خلق... *********************************** سعد/اقول جدتي... قاطعته الجدة بصراخ/ووجعه ..قول يمه ليش تكبرني؟؟ مشعل/ليش انتي بعدك صغيرة ياجدتي؟ الجدة ام خالد/أي بعدني صغيرة وماحد له عندي شي...قول شبغيت؟ سعد/سلامتك.....كنت بسالك عن حياتك انتي والباشمهندس.... الجدة ام خالد/ومنو هذا بعد؟انا غير جدك ماعرفت بحياتي!!! مشعل/قولي الصدق جدتي... سعد وعجبته السالفة انهم يلعبون في الجدة مثل كل اسبوع/يالله تكلمي ولا بنعلم جدي عن الباشمهندس... الجد ابو خالد من وراهم/منو هذا بعد اللي ماغسل وجهه؟ الجدة ام خالد بهمس/يويل حالي... مشعل بهمس/يدك على ميتين ريال ونسحب السالفة؟ الجدة ام خالد/وين عصاي؟ سعد بنفس الهمس/يالله تكلمي بسرعة يا أي يا لا... الجد ابو خالد/شفيكم..... سعد/ولاشي نقول لجدتي تبي شي احنا قايمين.. مشعل بتهديد/احنا قايمين ياجدتي وش قلتي؟ *********************************** نواف حط بيالة الشاي بقوة وقال بذهول/منهي... تركي بهدوء/نوف بنت عمي.. نواف/تصدق ماتوقعتها ابدا.... تركي وهو سرحان/اذوب فيها يانواف صدقني... نواف/؟؟؟؟؟؟؟؟؟؟ تركي تنهد/يحمدون ربهم ان البنت لسه بخير وماماتت من نظراتي لها... نواف/وش ها الحكي بعد؟ تركي/في قلبي نار تشب كل مايمر طاريها .. نواف/أي... تركي/شقولك بس يانواف خلها على الله.. نواف/من متى..لاتقولي من سكنت عندكم بالبيت كانت بعدها صغيرة ياتركي ماراح اصدقك؟ تركي/تصدق مدري من متى كل الي اعرفه ان كل يوم يزيد اللي بقلبي لها... نواف/ومتى بتصارحها؟ تركي/والله مدري ياخوك خايف مووت... نواف/من شنو؟ تركي/من اني اصارحها وتكون متعلقة بغيري... نواف/واذا كانت متعلقة بغيرك وتفكر فيه المفروض انك تعرف ها الشي بدري علشان لاتتعلق اكثر واكثر.. تركي بزعل/واقطع قلبي اكثر اكثر..... *********************************** عبدالله/وحشتني سواليفك.... مشاعل من وراه/منو هذا اللي وحشتك سواليفه..؟ لف لها بسرعة ولقاها تضحك وابتسم لها.. عبدالله/وانتي دايم كذا تجين بدون محد يحس فيك؟ مشاعل بنفخة/هذا لاني ريشة.. عبدالله/عدال بس لاتطيرين... مشاعل/لاتلف وتدور قول مني هاذي بنت الحلال اللي وحشتك؟ عبدالله بجدية/وليش ماهو ولد حلال؟ شهقت بقوة وفتحت عيونها على وسعها وضحك عليها... عبدالله/شفيك انتي...كل شي تصدقينه... مشاعل/انا ادري عنك...انت بعد...يااخي الدنيا خربانة خربانة... عبدالله/شوف اللي ماتستحي انا اخوك ولد امك وابوك غمزت له وقالت بتهديد/وبتقولي ياولد امي وابويمن تكون ها الحلوة اللي واحشتك؟ تنهد عبدالله وهو يناظر بجواله مشاعل/يعني بتقولي منهي ها الغزالة اللي تناظر فيها وقلبك متشوق يبيها... *********************************** هذا كان البارت الاول لمولودتي الجديدة(كل يوم لك حال جديد..يوم قريب ويوم بعيد) واتمنى انها تنال على اعجابكم ورضاكم... وتعالوا نشوف الشخصيات... الجد ابو خالد والجدة ام خالد...وبناتهم 1/ام تركي...(تركي/عبدالله/مرام/حصة/مشاعل) 2/ام سعد/(نورة/سعد/ريم) 3/(ام مشعل(مشعل/ياسمين) 4/خالد وزوجته وضحى بنت عمه... بيت عمهم(نواف/وضحى/لؤلؤة) بيت ام فارس(فارس/محمد/ريان/روان) وكل شخصية بيجي عنها الكلام بالتفصيل من خلال البارتات والف شكر لمتابعتكم يالغلا... **** *** ** * صباح الورد والياسمين....صباح الملح والسكر لااحلى اخوات وصديقات وناقدات... كيفكم يالغلا عساكم بخير ياوجه الخير.... مشكورين على متابعتكم وكلامكم الذوق ياذوق وان شاءالله اكون عند حسن الظن دايما.... بالنسبة للبارتات بيكون ميعادهم يومي مثل ماتعودنا الا اذا انتوا يالغلا تبونه بالاسبوع مرة عادي ماعندي مانع غالي والطلب رخيص ههههههه بيكون في يوم الجمعة استثنائي ومابينزل فيه بارت علشان ترتاحون من خشتي وتتنفسون الصعداء وطبعا بالشهر الفضيل الله يعوده على المسلمين بالخير والعافية راح اوقف وبعدها بنرجع نستانف من جديد ... واذا عندكم اي ملاحظات او اسئلة انا بالانتظار لاتستحون..واذا ملزمين تعلقون خلاص بعد البارت الخامس بحط لكم توقعات ولايهمكم هههههه المهم مابطول وبعرض بالكلام وخلونا نشوف بارت اليوم واحداثه يالغلا.... ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,, البارت الثاني.... ,,,,,,,,,,,,,,,,,,,,,,,,,,,,,,,,,,,,, سعد/ها جدتي بتعطيني الميتين ريال ولاشلون؟ الجدة بحلطمة/ماعندي... مشعل/اقول جدي ماتعرف منهو الباشمهندس اللي كنا نتكلم فيه.. قاطعته الجدة/اقول يابوحالد مافي بجيبك ميتين ريال.. سعد ومشعل كتموا ضحكاتهم... الجد بوخالد/لمنو؟ الجدة/موصية العيال يجيبون لي غرض... الجد/وش غرضه اللي ماعرفه... الجدة بتلعثم/غرض..غرض وبس.. الجد/انتي يوم شيبتي خرفتي وقمتي تخبين علي!!! سعد بهمس للجدة/يالله تكلمي ودافعي عن نفسك... الجدة بقهر/قوم اقلب خشتك ولاتوريني شكلك الا بعد شهر كامل!!! مشعل بتهديد/مو بكيفك اول تجيبين الفلوس ياجدتي ولابتروحين في علوم مع ها الشيبة المزيون.. الجدة بعصبية/استح هذا جدك... الجد/انتوا شفيكم تتكلمون كذا ماتبوني اسمع... سعد/اسال جدتي... الجد/جدتك خلاص خرفت وقضت... الجدة/ها..ها وش تقول يابو خالد؟؟؟ مشعل يهمس لسعد/شكلها راحت علينا وبتتفرغ له.. مشعل/لاوانا مشعل ماتروح,,, (سعد ومشعل....اول ابطال المغامرات في روايتنا...بزارين متوسط على قولة اختي ههههه عيال خالة وتلاقيهم نفس الهبال والتصرفات واللبس ومايختلفون الا بالشكل....همهم وشاغلهم الوحيد انهم يسوون مقالب في جدهم وجدتهم...) ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,, ام تركي/ماتقولي انت من متى ماشفتك؟ خالد بضحكة/من الخميس اللي فات... ياسمين/هههههه خالد/انتي انطقي انا واختي انتي شكوا... ياسمين/وانا شقلت عاد؟ ام سعد/الا وين وضحى ماجت معك ياخوي... خالد/صاحبتها بتمرها تبي منها كم ثوب مدري وش قالت... نورة/حدد ياخالي منهي اللي تبي من الثانية كم ثوب؟ خالد/افا..انا مرتي ماتلبس من عند احد اكيد صاحبتها اللي تبيهم... مشاعل/أي عاد احنا صدقناك... خالد مسوي معصب/ها..منهي ذي اللي تتكلم عن مرتي..حرم الاستاذ خالد العتيبي؟ مشاعل/وحدة... خالد/ادري فيها وحدة ماهم ثنتين واشوف جنبها دلة ياترى وش فيها... نورة/لاتستظرف عاد ياخالي اكيد مو بيبسي بالدلة؟ مشاعل/ههههههه ياسمين/حليب بالشوكلاته.. خالد/وليش ماتعزمون.. ام سعد/مابغيت الا اكرم الخلق يعزمونك هذولا لو تنقلب انت قدامهم شي يناكل اكلوك من زمان... خالد/ههه...امي وابوي وينهم؟ ام مشعل/مع مشعل وسعد... ام تركي/الله يهداهم بس..احنا جايين لهم وهم مقابلين ها البزارين.. خالد/خل اقوم الحق عليهم قبل لاتقوم داحس والغبراء...لان ها الاربعة مايجتمعون.... (خالد...الولد الوحيد بعد ثلاث بنات وها الشي مانقص منه بالعكس زاده شهامة ومرجلة وخلاه رجال ينشد فيه الضهر... عمره واحد وثلاثين سنة...متزوج من وضحى بنت عمه حسب رغبة ابوه وحبوا بعض بعد زواجهم بس حياتهم يوم روقان وعشرة هواااش.... اسمراني وحبوب وفيه شبه كبير بعبدالله ولد اخته..حبوب مع الكل وخصوصا البنات اللي شغلتهم بس يناقرون في بعض). ,,,,,,,,,,,,,,,,,,,,,,,,,,,,,,,,,,,,,,,,,,,,,,,,, لؤلؤة/وضيحي تراك مصختيها.... وضحى/انتي ماتوقفين معي ابدا دايم الدوم معاه.. لؤلؤة/لاني مو شايفته غلطان وضحى/لامو غلطان ياقلبي بس اقوله ابي اروح السوق يقولي جمعة اهلي!! لؤلؤة/ووين الغلط؟ وضحى بعصبية/سكتي واللي يعافيك... لؤلؤة/مشكلتي عارفة انك على علاقة حلوة ببيت عمي ولابقول ان هم السبب؟ وضحى/لامو هم السبب انا احبهم وهم يحبوني .. لؤلؤة/طيب وين المشكلة؟ وضحى/مافي مشكلة... لؤلؤة/تراك بتجنين الرجال معك.... وضحى/ياسلااام.... لؤلؤة/انتي عارفة ان اليوم جمعة بيت عمي وكل اسبوع تروحين معه وانا اكون هناك بعد في معظم الاحيان ليش ها الاسبوع غيرتي وتبين السوق؟ وضحى/والله مدري بس طقت فيني روحة السوق من قعدت من النوم شسوي بالله؟ لؤلؤة/اه منك انتي وزوجك معك بجد مافي مثلكم ابدا!!يوم حبايب وتنحسدون على علاقتكم ويوم عدوان وتدورون المشاكل من تحت الارض؟؟؟ (وضحى/البنت الكبيرة بعد نواف وتجي بعدها لؤلؤة..بس بالتفكير والعقل لؤلؤة متقدمة على وضحى بمراحل....ماهي بذاك الجمال الاسطوري اللي يمتلكونه الكثيرين بس جمالها واضح بعيونها ورقتها وطيبتها مع الكل ومع خالد في بعض الاحيان..مشكلتها دايم متعقدة من شي اسمه زواج ودايم تحس بان علاقتها بخالد بتنتهي باي لحظة فتخرب على نفسها وسعادتها بهواشها الدايم معاه وهذا يرجع لاامها واخوها نواف .. لؤلؤة/البنت الاعقل والاركد مافي بينها وبين اختها أي تشابه لابالتفكير ولابالشكل....تدرس مع نورة بنفس الجامعة) ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, بعد الساعة عشر ونص دخلت مشاعل غرفتها بالبيت مسوية نفسها زعلانة على نوف اللي من شافتها تركت الابتوب وابتسمت ومشاعل ماهي عاطية وجه.. نوف بتشاؤم/افا ليه الكشرة الكبيرة هاذي... مشاعل/وراك مادة البوز علينا ياحلوة... شالت عبايتها وقعدت على سريرها وقامت نوف ومسكت كتفها وسندت راسها عليه وضحكت/ياقلبي فرفشي ترى بجد ماتنطاقين وانتي مكشرة.. مشاعل/قومي ذلفي عني!! نوف/ ههههه مشاعل/لاتحاولين تكلميني... تنهدت نوف وقالت بزعل/ماعليه ميشو بجد ماكنت طايقة اروح ها الاسبوع وحسيت ا ني متضايقة... مشاعل/الشلة زعلانين عليك... نوف/براضيهم... مشاعل وحتى خالاتي يوم شافوك ماجيتي زعلوا عليك... نوف/الاسبوع الجاي باذن الله براضيهم اذا رحت بس انتي روقي... مشاعل/بالله ماتقولين لي وش استفدتي انتي يوم قابلتي ابوي.. نوف/ياسلاام ترى ماارضى على عمي انا... مشاعل/مقدر عليك ولاعلى عمك انا... نوف بدلع/شيشو... مشاعل/خلاص سكتنا انطمينا بس بجد بجد نورة وياسمين زعلانين عليك... نوف/اللحين بقوم اراضيهم مشاعل/هذا اللي انتي شاطرة فيه بتقومين تراضينهم مااخذنا منك حكي غير... (مشاعل..ترتيبها بالعيلة البنت الثانية من ناحية البنات ومن ناحية الاولاد يكون ترتيبها الرابعة..سمارها عجيب وعيونها عسلية فاتحة بسنة اولى جامعة. ... شخصيتها مزيج بين الحساسية والارهاف بالمشاعر وبين الانطواء والهدوء والكتمان ولكل شخصية ظروف بتمر فيها شلتها اقرب شي لها.... نوف/بنت اخو ابو تركي..انتقلت للسكن معهم بعد ماتوفى ابوها وامها بحادث وهي عمرها ثلاثة عشر سنة تبدلت مشاعرها من الحساسية والدلع الى الهيبة والشخصية الجادة بعد الفترة الصعبة اللي عاشتهاوبعد تخلي اخوها سعود عنها تدرس هي وياسمين بنفس الجامعة ثقلها وهيبتها اول شي يلفتون لها تحب عبدالله ولد عمها ومحد يدري عن ها الشي وتركي اخوه يحبها وهي ماتدري عنه علاقتها بكل عيال عمها حلوة وحتى خالاتهم ماعدا حصة الكبيرة واللي ماتواطنها ومرام اللي علاقتها معها نص ونص) ,,,,,,,,,,,,,,,,,,,,,,,,,,,,,,,,,,,,,,,,,,,,,,,,, في سيارة خالد... خالد/أي سوق تبين تروحين.. وضحة بسخرية/ صباح الليل تسوقت وشبعت في بيت اهلي!!! بحنية قال لها/ياعمري تدرين ان جمعتنا بالنسبة لي مهمة ومقدر اتخلى عنها .. وضحة/والمطلوب مني؟؟ خالد/هذا احنا رايحين السوق ماصار شي... وضحى/خالد السوق سكرت اذا ماتدري؟؟ خالد/عمري ماعليه ما... قاطعته بسرعة/راسي يعورني وابي انام؟؟؟ تنهد خالد وسكت ثواني بعدها قال بفرفشة مصحوبة برومنسية/تبين تنامين..اكيد وحشتك يالغلا؟؟؟ بصرامة قالت/الود ودي نمت عند اهلي,,, خالد/افا بس افا... وسوى روحه زعلان عليها وهي ماشالت همه ولفت عنه للنافذة وبعد فترة صمت قال لها بشوية زعل وهو يجر يدها ويمسكها/ولاتفكرين تراضيني بعد!! وضحى بدون نفس/مازعلت احد علشان اراضيه؟ خالد/اه منك ومن ثقلك بس علشاني احبك تتغلين علي!! ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,, الساعة وحدة ونص في غرفة عبدالله... دق تلفونه وفز له بلهفة من سمع ها النغمة الخاصة بحبيبته وشاله والرنة الثانية حتى ماكملت وبلهفة وشوق قال/الو.. عبير برواق/مرحبا... بشوق مصحوب بعتب كبير قال لها/وينك انتي؟ عبير/موجودة.. عبدالله وهو بعده زعلان/كم مكالمة وكم مسج وصلوك مني اليوم؟ عبير/ماعليش ياقلبي كنت مشغولة.. بلوم قال لها/طول اليوم عاد؟ عبير/كانوا اهلي حواليني .. عبدالله بنفس العتب/وماقدرتي تنفردين بنفسك دقيقة وحدة وتقولين لي انا مشغولة؟ عبير بلامبالاة/ماتوقعت ان عدم ردي عليك بيضايقك؟ عبدالله/قولي قسم؟ بانفعال قالت/الظاهر منت رايق ..وقت اللي تروق دق لي انا مااحب اتكلم معك كذا..يالله باي... تنهد بقوة بعد ماسكرت السماعة خوفه واهتمامه فيها دايما مايلاقون من حضرة جنابها أي قبول ولامبالاة ويطلع بالنهاية هو الغلطان..وش الصرفة معك ياعبير بس,,,,, (عبدالله....الابن الثاني لعيلة بو تركي... عمره 26 سنة...اسمر وعيونه سودة فيه وسامة وجاذبية بس مو كثر اخوه اللي هيبته تطغي عليه..فيه شبه قريب من خاله خالد...اللي يميزه اكثر شي رومنسيته وهدوئه...يحب عبير بنت جيرانهم اللي ماهي مقدرة حبه لها وتغب عنه بالايام ويظل هو يحاتيها ومايدري عن حب نوف له) ,,,,,,,,,,,,,,,,,,,,,,,,,,,,,,,,,,,,,,,,,,,,,,,, سعد/تصدقين الليلة هبلنا في جدتي انا ومشعل,,, وهي مشغولة بكمبيوترها قالت له/ومن متى وانتوا تاركينها بحالها اصلا!!!انتوا دايم تهبلون فيها وفي ذاك الشيبة اللي معها؟ سعد/ههههههه حلوة كلمة شيبة عجبتني من قلب.... نورة بدون مترفع راسها/وش سويتوا فيها الليلة بعد؟ سعد/لك خلق تسمعي... نورة/أي... سعد/زين رفعي راسك شوي عن ها الكمبيوتر؟ نورة/لاتحاف انا معك.....قول وش سويتوا؟ ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,, وهذا هو البارت الثاني واتمنى لكم قراْة ممتعة يالغلا...واشوفكم بكرة ان شاءالله **** *** ** * مرحبا فيكم كلكم يالغلا... منورين كالعادة بس ترى الاحداث والشخصيات تتقولب دايما (فكروا فيها هههه) للتحميل [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل] |
|
|
|
2011-03-21, 06:06 PM
|
#2 | |
 
|
رد: روايه كل يوم لك حال جديد .. مره قريب و مره بعيد - روايه طويله جريئه - للجوال txt
بــــــآآانتظار جديد بكل شوووووق
.~ كل الود لقلبك.~ |
|
|
’{♣ } ضَعْ ’( يدَيْكَ ) بيْنَ آرتجَآ إ فِ أصَآبعِيَ .. وَ آبقَ بَيْنَ إْضِلُعِيَّ ، لِـ نهْزِمْ ( زمُرةة ألحُسَّـآ إ دْ ) ،!’’
|
|
| مواقع النشر (المفضلة) |
| الكلمات الدلالية (Tags) |
| للجوال, تعيد, جديد, جريئه, روايه, طويله, قريت |
«
الموضوع السابق
|
الموضوع التالي
»
| الذين يشاهدون محتوى الموضوع الآن : 1 ( الأعضاء 0 والزوار 1) | |
العرض العادي
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| روايه يعرف نقطه ضعفي حبي له - يعرف نقطة ضعفي حبي له رومنسيه طويله للجوال txt | رهين الشوق | ملتقى القصص والروايات | 2 | 2017-03-05 08:12 PM |
| روايه مها وسلطان روايه سعوديه رومنسيه جرئيه للجوال txt 2011 | رهين الشوق | ملتقى القصص والروايات | 44 | 2014-09-20 03:39 PM |
| روايه عبير وعمران روايه رومانسيه جريئه للجوال txt 2011 | رهين الشوق | ملتقى القصص والروايات | 29 | 2012-08-13 05:06 AM |
| روايه طفاج القدر يا شمعتي-تحميل روايه رومنسيه جريئه-روايات رومنسيه txt للجوال 2010 | رهينة الشوق | ملتقى القصص والروايات | 5 | 2011-11-05 10:04 PM |
| روايه في الغربه إلتقينـا رومانسيه جريئه txt كامله -تحميل روايه في الغربه إلتقينـا | رهينة الشوق | ملتقى القصص والروايات | 5 | 2010-12-29 07:24 PM |
الساعة الآن 11:16 PM