جيت
جيت أتوسل وأطلب رضاك عييت
جيت أتعذر مانفع فيك حيله
ياعزوتي يامنوتي ليه صديت
وش فيك ترضى لي حياة(ن) ذليله
كم قلت لك أنظر تراني تعنيت
ياشين خل(ن) ما يقدر خليله
الله حسيبك في عذابي تسليت
منك المحبه شفتها مستحيله
لاتامن الأيام يومك تعاليت
يبلاك ربي والليالي طويله
كني غريق(ن) بحرك الموت ناديت
يصيح لكن مالقى من يشيله
حمل الهوى شلته وعن لومك أغضيت
كم عاشق(ن) في الحب ضيع دليله
أنا أشهد إني بالهوى ماتهنيت
حرمتني بالغدر دنيا جميله
لو التمني فيك مكسب تمنيت
يرجع من اللي فات يوم(ن) وليله
رجعت لك ردني لك والي البيت
رب(ن) يساعد كل من يلتجي له
مليت ياسيد المحبين مليت
حبك بقلبي جعل ربي يشيله
|