عرش الغلا
 

عرش الغلا قدره على قدر راعيه
ولاّ العروش الخاويات .. أمخلوفه
شيء يجي منّه وبإحسان .. ماأبيه
والله لو نفسي لمُلكه .. شغوفه
الله يصدّ العبد عنّه .. ويعطيه
عقلٍ يشوف .. ونفس بيضاء عطوفه
أنشد وأنا أجاوبك .. يا(لا) يا(إيه)
يا زينها بين الثّنين .. محفوفة
مافيه داعي تكشف العلم .. وأخفيه
مثلي يطابق هرج قلبه .. حروفه
وش حيلتك لاصار لك شخص تغليه؟
تطيح طيحاته .. وتاقف وقوفه
وش حيلتك لا صار بايعك شاريه ؟!
قلبك .. وشاري منزله مع ضيوفه
شفني ما غير أجيب ذكره وأودّيه
ولرضاه أسوّي كلّ ليلة .. بروفه
لين أنتهي والقوس .. في كفّ باريه
راحت طيوفه .. تشتبك مع طيوفه
وأنا ألين أموت .. باقي مواليه
لو تكثر أحزابه .. وتكثر أحلوفه
خلّه يروح .. وينجرح صدر مغليه
مسموح .. ولحون الوداع معزوفه
ماني بـ قايل في غيابه .. ترى فيه
بآقول حكمة .. من زمان معروفه
أحدٍ كفيفٍ .. وعين قلبه تقدّيه
وأحدٍ يشوف .. ولا يقدّيه شوفه