انا والليل والعبرة وجرح الخاطر المكسور
ونفس من هجير البعد والحرمان مقهورة
وقلب ظامي لشوفك ولايروي ظماه بحور
وعين تحتري لحظة غياب الطيف وحضورة
ونار تنطفي مرة ومرة تشتعل وتثور
واقول النار مقدورة وهي ماهيب مقدورة
حسبت الليل بغيابك يمرن الليال دهور
وكني شايل بقلبي ليال الوقت وشهوره
تصبرت وتقدرت وبنيت من الخيال قصور
الين ان الجفا شد الركايب وانتهى دوره
تحريتك على درب القصايد من ثلاث شهور
وحشا مامات لك غصن يشف الماي بجذوره
تخيرت الغرام وجيت لا راضي ولا مجبور
وجيت تسابق خطاك مرضية ومجبورة
وانا ماكان لي رغبة ابين واكشف المستور
ولكن الغرام اكبر من الخفاق وشعوره
جمال وود وعيون ودلال وكبرياء شعور
وفتنه تخذل عيون النهار وينطفي نوره
ولك في خافقي صوره تلاشت بين ضي ونور
واخاف اسكت من الفرحةوتنطق باسمك الصورة
عرفتك وانتهت رحلة قساوة دربي المهجور
ولا ياجملة ايام الجفا والصد مشكورة
خذتني للجفا عزه واخذني للعناد غرور
واخاف أكون بعنادي حبيب ومات بغروره
واذا كانت مسافات الخيانة للغرام قبور
وش اللي يجبر العاشق يخون ويحفر قبوره