دامك تعرف إنك بعد صدك تعـود
وش جابرك تمشي طريق المذلـه
ترى الكرامه يارفيقي لهـا حـدود
ودرب الثقل ياخوك منتـه تدلـه
صعبه تعوض نقصك بشي مفقود
من شان تاصل شي غيرك وصله
ترى التطبع بعض الاحيان منقـود
لو عشت جو الدور تفضحك زلـه
باقولها من دون تلميـح وقيـود
وكلن مع التوضيح يعرف محلـه
ترى التغلي يعتبر عنـدي جحـود
ومن شاف نفسه عفت بعضه وكله
من غاب ليله صار ماهو بموجود
اقدر بدال الشخص آجيـب شلـه
ياما نصحتك والبشر كلها شهـود
درب الثقـل بالله ياخـوك خلـه
ترى العمر وان طال ياخوك معدود
وإنت بعنادك زايـد الطيـن بلـه
إلا تبينـي اربـط القلـب بقيـود
واصير شخصن يتبعك مثل ظلـه
بدري عليك انهد وآصير مهـدود
وبدري على شرواك قلبـي يذلـه
شوف النهايه صرت تبكي ومكيود
وصرت اتمنى شوفتي لـو بطلـه
هذي علومـك ماورهـا ولا فـود
ومن هالرجاوي صابت القلب عله
لتذل نفسك والامل صـار مفقـود
جرحت خدك يـوم دمعـك تهلـه
ولتقول بفرش دربك ازهار وورود
فرقاك عندي عيـد والعيـد فلـه