أقفوا وخلوني وقلبي مجزعه كثر الونين
وخلــو فراغ فالعمـر كل البشر مـا سدته




خلوني أبكي بعدهم والهم فـي قلبي دفين
صكت على قلبي غرابيل الزمان وهدتـه




صرت أتبع الهوجاس وأسري لا ذكرت الغايبين
كني يتيم مالقـا امــه راح يتلي جدتـه




ويلاه يا وجدي عليهم وجـد مظلوم سجين
خلوه ربعه يوم ضرب الوقت زادت شدتـه




خلوه يصرخ ويتطلب مالقـا قلب يلين
ضدوه واقفوا دون رحمه والصوادف ضدته





أو وجد عود ذره بنيات مـا جالـه بنين
خارت قواه وطاح معتل وعجـز عن كدته





اليا فتح عينه وإلى هن من يسار ومن يمين
هن مالهن غيره وهو كف المنايـا لدتـه




القلب قطعه البكا ونياطه أبلاها الحنيـن
يسري ويهرب عن همومه والمصايب ردته




يا طول ليلي بعدهم يا جور دورات السنين
يا ويل قلبي دام سيف الوقت زادت حدته




وعزي لحالي والديار خلي عقب الراحلين
اللي مضوا درب السفر والبعد طالت مدته