البارحة ضاقت بي علوم وعلـوم ... وأشر من ضيقة علومـي بكايـه
كني على الدنياء مثل مبعد الحـوم ... اللي على الصيده يعجب التوايـه
ما وقع الا فوق عسرات ورجـوم ... واليوم خـادم بالشـرك والولايـه
والا مثل من يزعج الصوت بيقوم ... ولا قام طاح من الوجع والقصايه
ند الخصوم وجيش فتنه وزيـزوم ... ربعه عليـه مردديـن الوصايـه
أغلى غواليه عقب نطحت القـوم ... اتلى العهد من شوفته فـي قفايـه
أمسيت في ليل من النوم محـروم ... واصبحت مثل معسكرين الرمايـة
مرات احسن اني على البعد ملزوم ... ولا أقفيت من ربعي تزايد بلايـه
ومرات بين الربع ضايق ومهمـوم ... ومن لد في عيني وجعي ودوايـه
الصدر فيه الحرب الفرس والروم ... وفي الفكر عجت خيلهم في سمايه
اذكر تعدي بنـت واقفايـة قـروم ... اللي تبيح الدم وهي فـي ذرايـه
ما كانت بعيني يا كود انهـا تـوم ... وما كانت بعين البشر غيـر آيـه
اللي عتبها رمح ، وسكوتها سهوم ... بين الضلوع العوج تبحث خفايـه
ما تدري ان الجرح غالي ومحشوم ... من حشمته كنـه يقاسـم غلايـه
هي طعنتني وانتشر ريح يشمـوم ... واللـي قتلنـي طعنتيـن النهايـة
الله يسامحني على المزح واللـوم ... اثر الخطأ منـي بكـل الحكايـة
الله يحرم العين مـن لـذة النـوم ... كاني نويته بالخطـا مـن البدايـة
قولو لها ترضى على أوخيها التوم ... والا تصـد ولا تسمـع بكـايـه