ياغاليه جيتك من الشوق ولهان

ماأطيق اشوفك ياحياتي حزينـه

من يعترف مسموح لو كان غلطان

وشلون لاصرتي تساوين عينـــه

لو نختلف نبقى حبايب وخلان

انا رهين الشوق وانتي رهينــــه

المنتصر في كل الأحوال خسران

مهما يكون الوضع بينك وبينــــــه

دنياي ماتسوى وخاطرك زعــلان

لاينشغل قلبك ولا تحرجينـــــــــه

ياغاليه قدرك على الرأس ماهان

ولا عاش من هو ياحياتي يهينـه

ياغاليه باأفراح ولو كلي احـــزان

ومن شان عين يقال تكرم مدينه

انتي وانا روحين في داخل انسان

انا يسار القلب وانتي يمينــــــــه