من طبعي أرد الإساءة بالإحسان وأساير ظروف الزمان اللعيـنه
وأطوف الغلطة من فلان وفلان يعني من أجل عين تكـرم مدينه
الكامل الله والخطا طبع الانسان والدرب يفرق عن يساره ويميـنه
والصاحب اللي لـه معزة وله شان ان جاني بـشيـنه تذكـرت زينه
اتحمل اخطاءه معي قدر الإمكان من جـانبي تبقى العـــلاقه متينه
واللي يغلطني وانا ماني بغلطان اصـــــابعي احطها وسط عينه
ما دامني مسلم وفي قلبي إيمان عمر البحر ماشال هم السفينه
مرت علي انواع واشكال وألوان بين العقول الناقصة والـرزينه
عندي قناعة ان الإنسان شيطان اذا يهينك لازم انك تهينـــــــه
يعني اذا حاجتك بيدين عدوان يكفيك شر المهزلة والغــــــبينه
من كثر ما جاني من الناس خذلان تحرجني حتى كلمة الله يعـينه
صحيح لي ربع وجماعة وخلان وأضيق لكن حاجة الناس شيـنه
الشخص دام انه بكل شئ خسران تأكد انها من عمايل يديـــنه
من مرحلة حب ومشاعر وحرمان إن ما لعنت الحب تلعنه سنينه
اكتب شعر واعزف من اشواقي ألحان واسلي قلوب الغـرام الحزينه
ولو الشعر مخلوق في هيئة انسان والله لأقول له تسلم واقبل جبينه