وللحين طفلة خيالي ماكفاها شغب
أحيوا ظنون الصدور ومات طهر الغرام
وسقيت نخل السكوت ولانبت به رطب
لو كل حلم يتحقق لانخيت المنام
ماكان حال الحقيقه في عيوني صعب
شفهم ملوا كل ماحولي بكثر الزحام
وشفني بصمتي مليت إحساسهم بالعتب
وش صار لو زادوا بعين الضرير الظلام !؟؟
وش صار لو نادوا الضيقه وصدري رحب ؟؟
والبارحه طار من غصن السوالف ملام
والبوح : نارً من صدور الأوادم تِهِب
وأنا أكبر احلام عمري .. هالمواجع تنام
وأنا أصغر اللي سكن صدري نوايا مُحب
شح الفرح وإبتديتك والمشاعر صيام
والوقت : ليلً ملى وجه المسافر تعب
ياصمت .. وش عاد لو سمّو (حياك) ... انهزام
وأنت الجبل لاغدت ريح الحكاوي مهب
يكفي حضورك يشابه بالجفاف الغمام
ويكفيك بعيون فضة هالسوالف ذهب
كن أجمل العمر (صوت) وهـ/ الليالي ركام
ولا .. حسوا العابرين بصوت تحت النشب
لله توّي عرفت شلون .. معنى الهدام
وأنا أكثر اللي بنا سطح الأماني (سبب)
قل للأمل من عقب سهر المواجع ينام
أبطى صباح الحياة وكل حلم انشطب !
لو قصدهم باني النور ..لضرير الظلام
ماكان خلوني لنار السوالف... حطب !!