ياملهمة فكري بترتيب الاشعار
منك استمد أجمل بيوت القصيدة


مادمت هايم فيك مانيب محتار
اليا نويت اطلع بفكرة جديدة


عندك بساتين المعاني وانا اختار
والشارد ابحث عنه عندك واصيده


الله يفكك من صواديف الاقدار
وانتي فرح قلبي وشوقه وعيده


ما اهتم لامن صار في قلبك اسرار
فن القرايه في نواعسك اجيده


اقرى علومك كلها سر واجهار
وادري بك امن اسنين مهره عنيدة


انتي هواي .. وفيك ما اطيع الاشوار
ولو زاد حبك داخل القلب ازيده


في قربك الجنه .. وفي بعدك النار
ودرس المحبه من غلاك استفيده


واعطيك عشق ابدون حدٍ ومعيار
وازيد في قلبي لعينك رصيده


وابيات شعري لجلك اطوال واقصار
اشوفهن بالزين (بيت القصيدة)