|
نعمة النسيان
نعمة النسيــــــــــان
يـــانعمة النسيان يارحـــمة الله
لولاك أنا عزاه وش كان سويت
لو اذكر الـّلي كان دقـّه وجلـّه
ما كان ساعة في حياتي تهنــّيت
لولاي أسلــّي خاطري جاه علـّه
وارتاح لين ارسلت بعض التناهيت
لا ضعت بالنسيان وقتي يدلــّه
ولـّيت ياوقت العنا كيف عـيـيـّت
خلّ الفكر يرتاح والقلب خلـّه
في غيمة النســيان يلقى بها بـيت
أسـجّ بعض الوقت ما هو بـ ..كلــّه
واعود كنــّي ما عن الحال سجيـّت
اشوف كلــّش ثابـت في مـحلـّه
عن واقع الأيام ما كنـّي اقفيت
هذا ضحـى شمسـي وهذاك ظلـّه
والليل رعشة ساريات المواقيت
|