رد: ░▒▓◄سجّـل حضـوركـ ببيـت مـن الشعــر►▓▒░
قبل الغرآم وقبل ماأصير .. مغليك
أعاهدك مااقول : غير ..( آمر وسمْ )
حتى لو إنك قلت : برحل .. وأخليك
بقول لك : تامر على ما تبي .. تمْ
رآيحه أكون إنسانه .. تفهم مباديك
أشاركك بالضحك .. والحزن .. والهمْ
مهتمه بكْ .. وأغلي بعد من .. يخاويك
ومن لايهمك ماني بـ فيه .. مهتمْه
بفتح لك .. بصدري وقلبي .. شبابيك
وأنقش غرامك وأرسمه .. داخل الدمْ
وإنْ جاك نوم .. رموش عيني .. تغطيك
غمض عيونك وسط عيني وثم .. نمْ
وان قلت لي وش كبر حبي بخافيك ؟؟
أقول أحبك .. بس .. مدري أنا كمْ !!
أبيك تسرقني .. لروعة مراسيك
وأموت بك موتة غريق ٍ .. وسط يمْ
أبيك تدرك يوم انا جيت أماشيك
قصدي تكون أقرب من .. الخال والعمْ
قصدي تبعثرني .. اليا مر طاريك
وأحنْ لك .. وأجيك .. ملهوف لـ اللمْ
قصدي أعشقك .. وأتمناك .. وأرجيك
وأشفق على شوفك.. وضحكك .. مع الضمْ
أبيك تفهم ..!! يمكن أقبل تماديك
وأسامحك لا أخطيت .. وأقول : ماهمْ
لكن ..!! لو إنك قلت : برحل وأخليك!
بقول لك أبشر .. على ماتبي .. تمْ
|