موعد اخير
 

[ مدخل :

سولف أكثر ضقت من قلّ الكلام
كلّ مالمحت لك صوتك يغيب !

أسألك : بالله ياخي مو حرام
تجلس بجنبي هنا واحد غريب ؟!





فضا هالشارع وكانت خطاوي العابرين ظلال
تصوّرلي مسافات الغياب أرواح مخفيّة !

حرثت الأرض بـ أقدامي أروح وتنبت الأطلال
أعود وتذبل وجيهٍ .. خذت من هالأمل ضيّه !

شروق الشمس مايعني رجوع الحب والآمال :
يجوز إنه وداع الليل لأحلامي بـ مرثيّة !

وأظن حتى غروب الشمس مايعني ظلام الحال :
أنا اشعر فيه يكسيني حكاوي ناس منسيّة !

مشيت الشارع أتأمل مقاهي فارغة / تمثال :
بيوتٍ في ملامحها حزن واوراق مرميّة !

أدوزن عبرتي واضحك اشتت دمعتي والبال :
عجزت أخطف من أفكاره ولو لحظات عفويّة !

معي لك صورة ألوّح بها للي عبر رحّال :
معي أيام من خوفي معاي سنين مطفيّة !

معي لك عطر فـ كفوفي اشمّه لي معك سلسال :
معي لك صوت في سمعي يغنّي لي ( وداعيّة ) !

واذا فاض انتظاري جبت من ذكراك لي موّال :
انا .. أنهكني غْيابك تعيده كلّ .... صيفيّة !

تهادى في وصالك لي طفل خطّى على اليامال :
هدا وَاشرّع ابوابي .. هدا وتضمّك .. ايديّه !

ونكبر من جديد وكل مانكبر نعود أطفال :
نشكّل طين غُربتنا لقا وتْزيد .. حنّيّة !

تعال وطشّ في صدري عناك وزيدني غربال :
أنا حتى قساك أحس به لين وحسن نيّة !

تعال العاشق اللي مدّ خطواته مسا واغلال :
تعال وزاحم أكتاف الحنين وردّني .. حيّة !

أنا من غرّبت شمسك سكنت بوحشة الإهمال :
وحيدة مامعي إلا قصايد فيك .. محكيّة !

تعبت أساير همومٍ على كف الرجا تختال :
تعبت أرسم على صدر الطريق أحلام .. ورديّة !

تعال احتاج لي موعد أخير وسالفة : فنجال
أبشرب صوتك واحفظ ملامحْك .. الطفوليّة !




مخرج ]

غايبي : عدّى على فراقك فصول
آخر اللي اذكره فصْل الشّتا !

ضيقتي والصّبْح والورد الخجول :
كلّها تسأل " متى يرجع متى " ؟!

رد: موعد اخير
 

من أعذب واجمل ما قرأت والله !
أبيات ينحني لها الشعر
نحتاج كـ حرفك بلا مجاملة !
صحّ قلبك و لا هنتِو2

رد: موعد اخير
 

عاشقة الدموع
كعادتكـِ تتألقين بطروحكـِ التي تلامس قلوبنا واحاسيسنا
تسلمين على القصيدة يا ذووووق

رد: موعد اخير
 

ماشاء الله لا قوة الا بالله ابدعتي بالطرح ...

رجعت اقرأها مرتين من جمالها ..