منتديات رهين الشوق - تدري متى تعرف قدري وتفقدني

تِدْرِي مِتَى بِتِعْرِفْ قَدْرِي وْ تِفْقِدْنِي ؟!

لاَ رِخَصْتْ نَفْسِكْ لِشَخْصِِ مَا يِرَاعِيهَا

بُكْرَهْـ لاَ هَمْلُوكْ النَّاسْ تَذْكِرْنِي

و تِقُولْ عِزَاهْـ عِينِي مِنْ يِدَارِيهَا

مَدَامْ غِيرِي عَلَى قَلْبِكْ { مِشَارِكْنِي }

وِشْ هُو لَهْ أَعَلِّقْ الآمَالْ وْ أَبْنِيهَا

يَكْفِينِي إِنِّكْ رِحَلْتْ وْ مَنْتَ { عَايِفْنِي }

هَذَا عِزَا النَّفْسْ مِنْ كِثْرَة بَلاَوِيهَا

أَهْدِيتِكْ دُمُوعْ مِنْ طَعْنِتِكْ تَحْرِقْنِي

وْ إِنْتَ إِللِّي تِسْتَاهِلْ الدِّنْيَا وْ مَا فِيهَا

وْ أَهْدِيتِنِي جَرْحْ مُوجِعْنِي وْ عَاجِبْنِي

لِأَنَّ الهَدَايَا عَلَى مِقْدَارْ مِهْدِيهَا

صَحِيحْ { حِنَّا انْتِهِينَا } بَسْ صَدِّقْنِي

وَاللّه إِنِّكْ تِبْقَى { هُوَى رُوحِي } وْ غَالِيهَا

مَفْضُوحْ رَاعِي الهِيَامْ وْ نَظْرِتَه تِغَنِّي

مَلاَمْحَه وَاضْحَة فِي وَجْه رَاعِيهَا

لِكُلِّ دَاء ٍدَوَاءْ لُو هُو مِتْعِبِنِّي

إِلاَّ مَحَبِّتِكْ عَيَّتْ مِنْ يِدَاوِيهَا
‎
إِنْ قِلْتْ عَلِّمْنِي أَنْسَى لاَ تِعَلِّمْنِي

دِنْيَايْ لاَ مِنْ نِسِيتِكْ وِشْ تَالِيهَا
‎
فَارَقْتِنِي وْ ضَحْكِتِكْ عَيَّتْ تِفَارِقْنِي

وَاللّه يِلْعَنْ أُبُو الفَرْقَا وْ طَارِيهَا

مَقْدَرْ أَفَكِّرْ بْغِيرِكْ وْ إِنْتَ عَارِفْنِي

عَشَانْ حَاجَة بْقَلْبِي مَقْدَرْ أَخْفِيهَا
‎
أَخَافْ لاَ حَبِّنِي غِيرِكْ وْ عَاشَرْنِي

يِشُوفْ صُورِتِكْ فِي عِينِي وْ يُوحِيهَا
‎
نِشَدْتْ عَنِّكْ وْ سِمَعْتْ إِللِّي { يِفَرِّحْنِي }

وْ يِرْتَاحْ صَدْرِي مِنْ هُمُومِِ يِحَاتِيهَا

تَبِي تَعْرِفْ وِشْ عَلَى الفَرْقَا مْصَبِّرْنِي

إِنِّكْ بْخِيرْ وْ حَيَاتِكْ مِتْهَنِّي فِيهَا